मनिसा सुनार
बेलौरी, कञ्चनपुर –
जिल्ला प्रहरी कार्यालय कञ्चनपुरले बेलौरी नगरपालिकाको सभाहलमा नागरिक सुनुवाई कार्यक्रम सम्पन्न गरेको छ। ‘शान्तिपूर्ण एवम् सुरक्षित समाजका लागि समुदाय–प्रहरी साझेदारी’ भन्ने नाराका साथ आयोजित कार्यक्रममा इलाका प्रहरी कार्यालय बेलौरीले नगरपालिकामा सम्पादन गरेका विभिन्न कार्यक्रम तथा गतिविधिबारे जानकारी गराइयो।
कार्यक्रमका प्रमुख अतिथि बेलौरी नगरपालिकाका उपप्रमुख जोगराम चौधरी रहनुभएको थियो भने जिल्ला प्रहरी कार्यालय कञ्चनपुरका प्रमुख प्रहरी उपरीक्षक चक्र राज जोशी सभाध्यक्ष रहनुभएको थियो। कार्यक्रममा विभिन्न राजनीतिक दलका नगरप्रमुख तथा प्रतिनिधि, नगरपालिकाका प्रमुख प्रशासकीय अधिकृत गणेश सिंह ऐरी, वडाका जनप्रतिनिधि, नेपाल विद्युत प्राधिकरण, नेपाल टेलिकम, सिमा सुरक्षा, नापी कार्यालय, बैंक तथा वित्तीय संस्था, बेलौरी उद्योग वाणिज्य संघ, पूर्व प्रहरी संगठन, विद्यालय व्यवस्थापन समिति, व्यवसायी, समाजसेवी, खेलकुद नगर समिति, युवा सञ्जाल, महिला प्रतिनिधि तथा मिडियाकर्मीको उपस्थिति थियो।
प्रहरी कार्यसम्पादन तथा सुरक्षा अवस्था
इलाका प्रहरी कार्यालय बेलौरीले कार्यक्रममार्फत बेलौरी क्षेत्रमा ५ प्रहरी इकाइ रहेको जानकारी गराएको छ। हाल ८९ प्रहरी जनशक्तिको दरबन्दी रहेकोमा केवल ७० जना मात्र कार्यरत रहेको उल्लेख गरियो। विशेष गरी लालझाडी गाउँपालिका वडा नं २, ३, ४ र ६ मा रहेका प्रहरी चौकीहरूको संरचनागत सुधारको आवश्यकता औंल्याइयो।
लागूऔषध नियन्त्रण तथा अपराध नियन्त्रणयस
वर्ष ७४.९ ग्राम खैरो हेरोइन, १८६.४८ ग्राम चरेस र १.३२ ग्राम गाँजा बरामद गरिएको छ। लागूऔषध ओसारपसारमा संलग्न १५ पुरुष र ५ बालबालिकालाई पक्राउ गरिएको जानकारी गराइयो। चोरीका घटनामा अनुसन्धान जारी रहेको बताउँदै १० जनामाथि मुद्दा दर्ता भइसकेको तथा १६ वटा चोरीका मोटरसाइकल बरामद गरिएको जानकारी दिइयो।
वन्यजन्तु अपराध नियन्त्रणगत
फागुन १६ गते बेलौरी नगरपालिका वडा नं ७, ठुलो सिंहपुरबाट बाघको छाला, जरायोको सिंग, बदेलको बंगारा तथा वन्यजन्तु शिकारमा प्रयोग हुने सामग्रीसहित १ महिलालाई पक्राउ गरिएको जानकारी गराइयो।
अन्य कानूनी कारबाहीहरू
जुवातास मुद्दामा २७ जनालाई पक्राउ गरिएको, अवैध नदीजन्य पदार्थ ओसारपसारमा संलग्न ५ ट्र्याक्टर नियन्त्रणमा लिइएको र १ जनालाई अवैध हातहतियार सहित पक्राउ गरिएको बताइयो।
सवारी दुर्घटना तथा भन्सार छलि नियन्त्रण
हालसम्म ४३ सडक दुर्घटनामा २६ जनाको उद्दार गरिएको जानकारी दिइयो। भन्सार छलि नियन्त्रण अन्तर्गत ४७ लाख २१ हजार ३० रुपैयाँ बराबरको सामान भन्सार पठाइएको र १६ लाख ३२ हजार १०१ रुपैयाँ बराबरको अवैध मासु तथा अन्य सामग्री नष्ट गरिएको उल्लेख गरियो।
समुदाय प्रहरी साझेदारी र चुनौतीहरू
प्रहरीले ‘समुदाय प्रहरी साझेदारी’ अन्तर्गत ८१ सचेतनामूलक कार्यक्रम सञ्चालन गरेको जानकारी गरायो। साथै, सीमित स्रोतसाधनका कारण प्रति प्रहरी ७६५ नागरिकको सुरक्षाको जिम्मेवारी रहेको बताइयो। खुला सिमाना, साइबर अपराध, ट्राफिक नियम उल्लङ्घन, लागूऔषध दुर्व्यसन, विपद् व्यवस्थापन तथा वन्यजन्तुजन्य समस्याहरू प्रमुख चुनौती रहेको उल्लेख गरियो।
कार्यक्रममा जिल्ला प्रहरी कार्यालय प्रमुख प्रहरी उपरीक्षक चक्र राज जोशीले जनताको सहयोग बिना शान्ति सुरक्षा सम्भव नरहेको बताउँदै नागरिकलाई ‘विना बर्दीका प्रहरी’ को रूपमा काम गर्न आग्रह गर्नुभयो। बेलौरी नगरपालिकाका उपप्रमुख जोगराम चौधरीले नगरवासीका गुनासा सम्बोधन गर्ने प्रतिबद्धता व्यक्त गर्दै स्थानीय सरकार सदैव नागरिकहितमा क्रियाशील रहेको बताउनुभयो।
