हेमा भट्ट २३चैत २०८१
कञ्चनपुर कृष्णपुर नगरपालिका वडा नम्बर ७ चैत २३ गते, चैते अष्टमीको पावन अवसरमा श्री उग्रतारा सामुदायिक वनमा परम्परागत बाजा गाजा, धामीझाँक्री, र विधिपूर्वक बनदेवी थानको स्थापना गरिएको छ। यस धार्मिक कार्यक्रममा समुदायका अगुवा, धार्मिक भक्तजन, महिला समूह, र युवाहरूको उल्लेखनीय सहभागिता रहेको थियो।
पूजाका क्रममा धामीझाँक्रीहरूले बनदेवीको आह्वान गर्दै वन संरक्षण, जैविक विविधताको महत्व, र भविष्यका पुस्ताका लागि हरियाली जोगाउनु पर्ने कुरामा जोड दिए। बनदेवी थानको स्थापनाले सामुदायिक वनमा आध्यात्मिक आस्था र संरक्षणको सन्देशलाई गहिरो बनाउने अपेक्षा गरिएको छ।
यस अवसरमा वनका अध्यक्ष मदन रानाले वन संरक्षणमा समुदायको भूमिका महत्वपूर्ण रहेको उल्लेख गर्दै, डढेलोबाट वन जोगाउन उपभोक्ताहरूको सहयोग आवश्यक रहेको बताए। उनले परम्परा र प्रकृतिको समन्वयमार्फत सामुदायिक चेतना अभिवृद्धि गर्न यस्ता कार्यक्रमहरू प्रभावकारी हुने विश्वास व्यक्त गरे।
