चैत २८ धनगढी
कैलालीको गोदावरी नगरपालिकामा हालै नियुक्त भएका प्रमुख प्रशासकीय अधिकृत धर्मराज बिनाडी र लेखा शाखा प्रमुख प्रकाश भट्टलाई औपचारिक स्वागत गरिएको छ। नगरपालिका सभाहलमा आयोजित कार्यक्रममा नगर प्रमुख, जनप्रतिनिधि तथा कर्मचारीहरूको उपस्थिति रहेको थियो।
कार्यक्रममा प्रमुख प्रशासकीय अधिकृत बिनाडी र लेखा प्रमुख भट्टलाई खादा र माला अर्पण गरी सम्मान गरिएको हो। स्वागत कार्यक्रमलाई सम्बोधन गर्दै नगर प्रमुख बिरेन्द्र भट्टले बिनाडीको प्रशासनिक दक्षता, अनुभव र नेतृत्व क्षमताले नगरको समुन्नत विकासमा टेवा पुर्याउने विश्वास व्यक्त गरे। उनले समन्वय र सहकार्यका साथ अघि बढ्न सबै पक्षबीच स्पष्ट संवाद र समझदारी आवश्यक रहेको धारणा राखे।
उक्त कार्यक्रममा अन्य जनप्रतिनिधिहरूले पनि नयाँ नेतृत्वबाट योजनाको प्रभावकारी कार्यान्वयन, वित्तीय अनुशासन, सेवा प्रवाहमा सुधार तथा जनसरोकारका मुद्दामा सकारात्मक परिवर्तनको अपेक्षा व्यक्त गरे। कर्मचारी प्रतिनिधिहरूले प्रमुख प्रशासकीय अधिकृतसँग पूर्ण सहयोग र सहकार्य गर्ने प्रतिवद्धता जनाए।
प्रमुख प्रशासकीय अधिकृत धर्मराज बिनाडीले आफूलाई प्राप्त जिम्मेवारीप्रति गम्भीरता प्रकट गर्दै जनप्रतिनिधि, कर्मचारी र नागरिकहरूसँग सहकार्यमा काम गर्ने अठोट व्यक्त गरे। उनले इमानदारीपूर्वक सेवा दिने प्रतिबद्धता पनि जनाए।गोदावरी नगरपालिकामा भएको यो स्वागत कार्यक्रमले स्थानीय तहमा प्रशासनिक नेतृत्वको स्थानान्तरण कत्तिको महत्वपूर्ण हुन्छ भन्ने संकेत गर्छ। प्रशासकीय तथा वित्तीय नेतृत्वको परिवर्तनले नगरपालिकाको कार्यशैलीमा नयाँ दिशा दिने सम्भावना रहन्छ। यस्तो प्रकारका कार्यक्रमहरूले केवल स्वागत मात्र होइन, भावी समन्वयको सन्देश पनि दिन्छन्। जनप्रतिनिधि र कर्मचारीबीचको सहकार्यले स्थानीय सरकारको प्रभावकारिता बढाउने अपेक्षा गर्न सकिन्छ।
