हेमा भट्ट -२६ असार २०८२
कञ्चनपुर-कञ्चनपुरको कृष्णपुर नगरपालिका–९, पिपरियामा अवस्थित जानकी सामुदायिक वन उपभोक्ता समूह अन्तर्गतको संरक्षित तालको मर्मत कार्य तीव्र गतिमा अघि बढिरहेको छ। ताल संरक्षणको अभियान जानकी सामुदायिक वनको पहल र वन अध्यक्ष चन्द्र प्रकाश (सीपी) भट्टको नेतृत्वमा सञ्चालन भइरहेको छ।
धार्मिक र पर्यावरणीय दृष्टिले महत्त्वपूर्ण बन्दै गएको जानकी तालमा संरक्षण तथा प्रवर्द्धन कार्य सक्रिय
धार्मिक र सांस्कृतिक महत्त्व-स्थानीयहरूका अनुसार तालले हाल धार्मिक, सांस्कृतिक तथा पर्यटकीय दृष्टिले विशेष महत्त्व लिँदै गएको छ। हरेक वर्ष शिवरात्रीका अवसरमा भव्य मेला आयोजना हुने गरेको र यसले ताललाई धार्मिक केन्द्रको रूपमा स्थापित गर्न सहयोग पुगेको बताइन्छ।
संरक्षणमा सामुदायिक सक्रियता-वन क्षेत्रको संरक्षणका लागि तारजाली निर्माण, डढेलो नियन्त्रण, चोरी–शिकार रोकथाम, र छाडा चौपायाको नियन्त्रण जस्ता विविध उपायहरू अपनाइएको छ। यी उपायहरूले जैविक विविधताको संरक्षणमा उल्लेखनीय प्रगति गरेको स्थानीयहरूको धारणा छ।
जैविक विविधता र लोपोन्मुख प्रजातिको आश्रय-जानकी सामुदायिक वन क्षेत्रमा साल, असना लगायतका बहुमूल्य वनस्पति पाइन्छन्। साथै, लोपोन्मुख अवस्थामा रहेका गिद्धजस्ता चराहरूको लागि सुरक्षित आश्रयस्थल बन्दै गएको छ। वन क्षेत्रको जैविक सन्तुलन कायम राख्न संरक्षण कार्यले महत्वपूर्ण योगदान दिएको छ।
सचेतनामूलक कार्यक्रम-सामुदायिक वन उपभोक्ता समूहले वन ऐन, कानुन तथा कार्ययोजनाबारे उपभोक्ताहरूमाझ जानकारी दिने उद्देश्यले सचेतनामूलक कार्यक्रम सञ्चालन गरेको छ। कार्यक्रम कृष्णपुर नगरपालिका–८ र ९, पिपरिया क्षेत्रका उपभोक्ताहरूलाई लक्षित थियो।
पर्यावरण संरक्षणसँगै आर्थिक सम्भावना-वन संरक्षण र व्यवस्थापन सँगसँगै ताललाई पर्यटकीय गन्तव्यको रूपमा विकास गर्ने प्रयासले स्थानीय आय–आर्जनमा समेत सकारात्मक प्रभाव पार्न थालेको छ। तालको समुचित व्यवस्थापनले स्थानीय पर्यटन प्रवर्द्धन र आर्थिक सशक्तीकरणका लागि अवसर सिर्जना गरेको छ।
