हेमा भट्ट, असार ३०, २०८२, कञ्चनपुर –कृष्णपुर नगरपालिकाले सञ्चालन गरेको “नागरिकसँग मेयर कार्यक्रम तथा नसर्ने रोग पहिचान अभियान” प्रभावकारी ढंगले सम्पन्न भएको छ। फागुनदेखि असारसम्म सञ्चालित यस अभियानले नगरवासीको घरदैलोमै पुगेर स्वास्थ्य सेवा उपलब्ध गराएपछि स्थानीयहरू हर्षित भएका छन्।
नगर प्रमुख हेमराज ओझाको नेतृत्वमा तीन वर्षदेखि सञ्चालन हुँदै आएको यस कार्यक्रमले स्वास्थ्य पहुँचबिहीन समुदायसम्म सेवा पुर्याउँदै आएको छ। यस आर्थिक वर्ष २०८१/८२ मा मात्रै ३२ हजार ६ सय ५ जनाले स्वास्थ्य सेवा लिएका छन्, जसमा १९,६९९ महिला र १२,९०६ पुरुष रहेका छन्।
स्वास्थ्य सेवा घरदैलोमै पालिका अन्तर्गत १२ जना स्वास्थ्यकर्मीको टोलीले वडादेखि वडासम्म पुगेर सुगर, प्रेसर, पिसाब परीक्षण तथा अन्य प्रारम्भिक स्वास्थ्य चेकजाँच गरी आवश्यक औषधी, परामर्श तथा एम्बुलेन्स सेवा निःशुल्क प्रदान गरिएको हो। जटिल अवस्था देखिएकालाई कृष्णपुर प्राथमिक स्वास्थ्य केन्द्रमा र गम्भीर अवस्थाका बिरामीलाई महेन्द्रनगर वा धनगढीसम्म पुर्याइएको हो।
कृष्णपुर–५ की करर्नी चौधरी भन्छिन्, “जीवनमै पहिलोपटक स्वास्थ्यकर्मी घरमै आएर जाँच गरिदिए। यस्ता सेवा अरू पालिकाले पनि दिनुपर्छ।”
त्यसैगरी, कृष्णपुर–५ का नन्दराज भट्ट र कृष्णपुर–१ का रतन विक लगायत अन्य नागरिकले पनि कार्यक्रमबाट आफूहरू लाभान्वित भएको बताएका छन्।
स्वास्थ्य शाखा प्रमुख रतन सिंह विष्टका अनुसार अभियान अन्तर्गत १२ जनामा क्षयरोग र १ जनामा कुष्ठरोग पत्ता लागेको छ। उनीहरूको उपचार व्यवस्थापनसमेत पालिकाले गरिरहेको छ।
अभियानमा स्वास्थ्यकर्मी अन्जु कुमारी जैशी, विपना चौधरी, स्वस्तिका नाथ, सुरेन्द्र बहादुर रावल लगायतले उल्लेखनीय भूमिका खेलेका थिए।
समापन कार्यक्रममा नगर उपप्रमुख द्रौपदी रानाले अभियानले नागरिकमा स्वास्थ्यप्रति जागरुकता र पहुँच विस्तारमा महत्वपूर्ण भूमिका खेलेको बताइन्। वडा नं. ५ का वडाध्यक्ष टेकबहादुर पाण्डेले अध्यक्षता गरेको कार्यक्रममा मेयर ओझाले भने, “स्वस्थ नगर, समृद्ध नगरको आधार नै नागरिकमा सचेतना र समयमै प्रदान गरिने सेवा हो।”
नगरप्रमुख ओझाले आगामी दिनमा सर्पदंश उपचार सहितको आइसियु सेवा केन्द्र सञ्चालन गर्ने तयारी भइरहेको जानकारी पनि दिए।
यस अभियानले स्थानीय सरकार नागरिकको स्वास्थ्यप्रति कति प्रतिबद्ध छ भन्ने स्पष्ट पारेको छ। प्रारम्भिक परीक्षण, जनचेतना, स्वास्थ्य पहुँच र सेवा विस्तारका दृष्टिकोणले कृष्णपुर नगरपालिकाको यो कार्यक्रम उदाहरणीय बनेको छ।
