खेमराज भट्ट, कार्तिक १३
काठमाण्डौ — उपत्यका ट्राफिक प्रहरी कार्यालयमा कार्यरत प्रहरी वरिष्ठ हवल्दार रमेश दत्त पन्तलाई असोज महिनाको “Best Traffic Police of the Month” घोषणा गरिएको छ।
मिति २०८२ असोज २३ र २४ गते जेन्जी समूहद्वारा गरिएको आन्दोलनका क्रममा कार्यालयमा तोडफोड र आगजनीजस्ता घटनापछि पुनःनिर्माणदेखि लिएर ट्राफिक व्यवस्थापनसम्मका जिम्मेवारी प्रभावकारी रूपमा पूरा गरेको कारण पन्तलाई यो सम्मान प्रदान गरिएको हो।
उहाँले उपत्यकाभित्र सवारी चोरी नियन्त्रण, सुचारु सवारी आवागमन, माथिल्लो कमाण्डको आदेशपालना, ड्युटी निर्धारण तथा अति विशिष्ट व्यक्तिहरूको सवारी आवागमन सहज बनाउने कार्यमा उल्लेखनीय योगदान पुर्याएका छन्।
त्यसैगरी, ट्राफिक नियम उल्लंघन गर्ने सवारी चालकहरूलाई कारबाहीमा ल्याउने, आम सर्वसाधारणबाट सकारात्मक प्रतिक्रिया प्राप्त गर्ने र कार्यालयको नीति निर्देशनलाई अक्षरशः पालना गर्दै सुरक्षित, सरल र भरपर्दो ट्राफिक प्रणाली निर्माणमा सक्रिय भूमिका निर्वाह गरेको मूल्याङ्कनमा उहाँलाई उत्कृष्ट घोषित गरिएको हो।
उपत्यका ट्राफिक प्रहरी कार्यालयका अनुसार, पन्तको अनुकरणीय कार्यशैली अन्य प्रहरी कर्मचारीका लागि प्रेरणादायी उदाहरण बनेको छ।
