हेमा भट्ट,चैत २७
कञ्चनपुर – जनउत्थान सामुदायिक लघुवित्त वित्तीय संस्था लिमिटेड अन्तर्गत सञ्चालित रैकवार बिचवा शाखाले आफ्नो १६औँ वार्षिकोत्सवको अवसरलाई सामाजिक उत्तरदायित्वसँग जोड्दै उदाहरणीय कार्यक्रम सम्पन्न गरेको छ। संस्थाले समाजप्रति आफ्नो प्रतिबद्धता व्यवहारमै देखाउँदै अपाङ्गता भएका विद्यार्थीहरूलाई लक्षित गरी खाद्यान्न सहयोग वितरण गरेको हो।
२०८२ साल चैत २७ गते शुक्रबार आयोजित उक्त कार्यक्रममा गोदावरी नगरपालिका-२, अत्तरिया स्थित सुदूरपश्चिम समावेशी आधारभूत विद्यालयमा अध्ययनरत अपाङ्गता भएका विद्यार्थीहरूलाई आवश्यक खाद्यान्न सामग्री प्रदान गरिएको थियो। संस्थाले वार्षिकोत्सवलाई केवल औपचारिकतामा सीमित नराखी समुदायका आवश्यकता बुझ्दै सहायतामूलक कार्यक्रम आयोजना गर्नु सकारात्मक र प्रेरणादायी कदमका रूपमा हेरिएको छ।
शाखा सञ्चालन अधिकृत गरेश बहादुर भुलको अध्यक्षतामा सम्पन्न कार्यक्रममा प्रमुख अतिथिका रूपमा देवी साउद तथा विशिष्ट अतिथिका रूपमा रामलाल चौधरीको उपस्थिति रहेको थियो। कार्यक्रममा स्थानीय समुदायका प्रतिनिधि, अभिभावक तथा विद्यालय परिवारको समेत उल्लेखनीय सहभागिता देखिएको थियो, जसले कार्यक्रमलाई अझ प्रभावकारी बनाएको थियो।
खाद्यान्न सहयोग प्राप्त गर्ने विद्यार्थीहरूमा पवित्रा कुमारी शर्मा, ललिता कडारा, गोमती ताम्राकार, सरख्खती भट्ट, यलिना जोशी, मनोहर राना, रोहित थापा, अर्जुन खड्का, आनन्द साउद, सिरेश बुढा र आरुस सिंहलगायत रहेका थिए। उनीहरूलाई चामल, दाल, तेल, नुन लगायतका दैनिक उपभोग्य खाद्य सामग्री वितरण गरिएको थियो। सहयोग प्राप्त गरेपछि विद्यार्थीहरू तथा अभिभावकहरूले संस्थाप्रति आभार व्यक्त गरेका थिए।
कार्यक्रममा बोल्दै प्रमुख अतिथि देवी साउदले यस्ता सामाजिक कार्यहरूले संस्थाको विश्वसनीयता बढाउनुका साथै समुदायसँगको सम्बन्ध मजबुत बनाउने बताइन्। उनले अपाङ्गता भएका बालबालिकाको शिक्षामा सहयोग गर्नु समाजको साझा दायित्व भएको उल्लेख गर्दै यस्ता कार्यक्रमहरू निरन्तर हुनुपर्नेमा जोड दिइन्।
त्यसैगरी, शाखा सञ्चालन अधिकृत गरेश बहादुर भुलले संस्थाले “स्वाधीन अर्थतन्त्रका लागि समावेशी वित्तीय प्रणाली” भन्ने मूल नारालाई व्यवहारमा उतार्ने प्रयास स्वरूप यस्ता कार्यक्रमहरू सञ्चालन गर्दै आएको बताए। उनले आगामी दिनमा पनि समुदायका विभिन्न वर्गलाई लक्षित गर्दै सामाजिक तथा मानवीय कार्यहरूलाई निरन्तरता दिइने प्रतिबद्धता व्यक्त गरे।
नेपाल राष्ट्र बैंकबाट ‘घ’ वर्गको इजाजतपत्र प्राप्त उक्त वित्तीय संस्थाले हाल देशका १९ जिल्लामा आफ्नो सेवा विस्तार गरिसकेको छ। ग्रामीण तथा विपन्न वर्गलाई लक्षित गर्दै वित्तीय पहुँच विस्तार गर्नुका साथै सामाजिक उत्तरदायित्व अन्तर्गत विभिन्न कार्यक्रमहरू सञ्चालन गर्दै आएको छ।
विशेषगरी कञ्चनपुरस्थित रैकवार बिचवा शाखाले स्थानीय स्तरमा शिक्षा, स्वास्थ्य तथा सामाजिक क्षेत्रमा योगदान पुर्याउँदै समुदायसँगको सम्बन्धलाई अझ सुदृढ बनाउने काम गर्दै आएको छ। यस्ता गतिविधिहरूले वित्तीय संस्थालाई केवल आर्थिक कारोबारमा सीमित नराखी सामाजिक परिवर्तनको सहयात्रीका रूपमा स्थापित गर्न मद्दत पुर्याइरहेको देखिन्छ।
समग्रमा, वार्षिकोत्सवको अवसरमा गरिएको यस खाद्यान्न सहयोग कार्यक्रमले मानवीय संवेदनशीलता, सामाजिक उत्तरदायित्व र समावेशी विकासप्रतिको प्रतिबद्धतालाई उजागर गर्दै अन्य संस्थाहरूका लागि पनि प्रेरणाको स्रोत बनेको छ।
