हेमा भट्ट, बैशाख १७
कञ्चनपुर – कृष्णपुर नगरपालिका वडा नं. ६ स्थित श्री सरस्वती माध्यमिक विद्यालयमा सम्पन्न अभिभावक भेलाबाट विद्यालय व्यवस्थापन समितिको अध्यक्ष पदमा लक्ष्मण वड पुनः सर्वसम्मत रूपमा चयन भएका छन्। विद्यालय परिसरमा आयोजित कार्यक्रम शान्त, सौहार्दपूर्ण र उत्साहजनक वातावरणमा सम्पन्न भएको हो।
भेलामा अभिभावक, शिक्षक, बुद्धिजीवी, समाजसेवी तथा स्थानीय अगुवाहरूको उल्लेखनीय उपस्थिति रहेको थियो। सबै पक्षको साझा सहमति, विश्वास र समर्थनका आधारमा वडलाई पुनः अध्यक्षको जिम्मेवारी प्रदान गरिएको हो। यस निर्णयसँगै विद्यालयको समग्र विकास र शैक्षिक सुधारमा नयाँ ऊर्जा थपिएको सहभागीहरूले बताएका छन्।
नव-पुनः चयनित अध्यक्ष लक्ष्मण वडले आफूलाई पुनः विश्वासका साथ जिम्मेवारी दिएकोमा सम्पूर्ण अभिभावक, शिक्षक तथा विद्यालय परिवारप्रति आभार व्यक्त गरे। उनले विद्यालयलाई गुणस्तरीय शिक्षाको केन्द्रका रूपमा विकास गर्न पूर्ण रूपमा समर्पित रहने प्रतिबद्धता जनाए।
उनले भने, “मलाई पुनः अध्यक्षको जिम्मेवारी दिनु भएकोमा सम्पूर्ण अभिभावक, शिक्षक, बुद्धिजीवी तथा स्थानीय दाजुभाइ दिदीबहिनीहरूप्रति विशेष धन्यवाद व्यक्त गर्दछु। यो विश्वासलाई म शैक्षिक गुणस्तर सुधार, अनुशासन सुदृढीकरण, भौतिक पूर्वाधार विकास र विद्यार्थीको उज्ज्वल भविष्य निर्माणमा समर्पित भएर पूरा गर्नेछु।”
भेलामा सहभागी अभिभावकहरूले विद्यालयको समग्र सुधार, गुणस्तरीय शिक्षा प्रवर्द्धन, नियमित अनुगमन तथा शिक्षक–विद्यार्थीबीच प्रभावकारी समन्वय आवश्यक रहेको औंल्याएका थिए। उनीहरूले नयाँ कार्यसमितिले विद्यालयलाई अझ अनुशासित, व्यवस्थित र परिणाममुखी बनाउने अपेक्षा व्यक्त गरेका छन्।
त्यसैगरी स्थानीय बुद्धिजीवीहरूले विद्यालयलाई नमुना शैक्षिक केन्द्रका रूपमा विकास गर्न सबै सरोकारवालाबीच सहकार्य अपरिहार्य रहेकोमा जोड दिएका थिए। उनीहरूको भनाइमा समुदाय, अभिभावक, शिक्षक र व्यवस्थापन समिति एकताबद्ध भएर अघि बढेमा विद्यालयले उल्लेखनीय उपलब्धि हासिल गर्न सक्नेछ।
विद्यालय प्रशासनले पनि नवगठित कार्यसमितिसँग समन्वय गर्दै शैक्षिक गुणस्तर अभिवृद्धि, डिजिटल शिक्षण प्रणाली विस्तार, विद्यार्थीमैत्री वातावरण निर्माण तथा भौतिक पूर्वाधार सुदृढीकरणलाई प्राथमिकतामा राखेर काम गर्ने जनाएको छ।
कार्यक्रमको अन्त्यमा सहभागी सबै पक्षले नयाँ कार्यकाल सफल, प्रभावकारी र उपलब्धिमूलक होस् भन्ने शुभकामना व्यक्त गर्दै विद्यालयको उज्ज्वल भविष्यप्रति आशावादी रहेको धारणा व्यक्त गरेका थिए।
कार्यक्रममा कृष्णपुर नगरपालिका वडा नं. ६ का वडा अध्यक्ष बाबुराम चौधरी प्रमुख अतिथि रहेका थिए। उनले नव-निर्वाचित अध्यक्षलाई टीका लगाई स्वागत गर्दै सफल कार्यकालको शुभकामना व्यक्त गरेका थिए।
