रिलिशा राजवंशी, भाद्र १२
बाँके — राप्ती सोनारी गाउँपालिका–५ टडुवास्थित धुमैया खोला स्थानीयवासी र यात्रुका लागि त्रासदीको पर्याय बन्दै गएको छ। गत राति देखि आज बेलुकीसम्म एउटै स्थानमा पटक–पटक सवारीसाधन भास्सिनुका घटना घटेपछि जनजीवन असुरक्षित बनेको छ।
स्थानीयका अनुसार आज बिहान करिब ४ बजेतिर एक ट्रक खोलामा फसेर घण्टौँसम्म सडक अवरुद्ध भयो। ट्रक खोलाबाट बाहिर निकाल्न नपाउँदै बेलुकी फेरि सोही ठाउँमा यात्रु सवार जिप समेत भास्सिएपछि स्थानीयवासी आत्तिएका छन्। स्थानीयको ठेलठाल र जोखिमपूर्ण प्रयासपछि जिपलाई कसरीतरी पार गरिएको भए पनि यात्रुहरू सुरक्षित रहनु संयोग मात्रै भएको उनीहरूको भनाइ छ।
यस्ता घटनापछि सामान्यतया प्रहरी, सडक डिभिजन वा सम्बन्धित निकाय तत्काल घटनास्थलमा पुग्ने अपेक्षा गरिन्छ। तर, आजको घटनामा भने राज्यका निकायको कुनै सक्रियता देखिएन। यात्रु र स्थानीयले आफ्नै बलबुतामा समस्या समाधान गर्नुपर्ने अवस्था सिर्जना भयो।
“हामी वर्षौँदेखि यही दुःख भोगिरहेका छौँ। खोला आउनेबित्तिकै सवारीसाधन फस्छ, बाटो रोकिन्छ, जनधनको ठूलो जोखिम हुन्छ। तर, सरकार र निकायले कहिल्यै समाधान गरेनन्,” एक स्थानीय अगुवा भनाइ उद्धृत गर्दै।
धुमैया खोलामा वर्षेनी यस्तै समस्या हुने गरेको स्थानीयहरू बताउँछन्। वर्षात्मा खोलामा पानी बढ्दा पुल वा तटबन्धको अभावमा सवारीसाधन खोलामा भास्सिने, सडक अवरुद्ध हुने र यात्रुहरू घण्टौँ अलपत्र पर्ने गरेको छ। स्थानीयहरूको तर्क छ — “जति बेला खोला उर्लन्छ, त्यति बेला सडक नै अवरुद्ध हुन्छ। विद्यालय जानुपर्ने विद्यार्थी, अस्पताल जानुपर्ने बिरामी, दैनिक मजदुर सबैजना प्रभावित हुन्छन्।”
यस्तो अवस्था दोहोरिँदा पनि सम्बन्धित निकाय मौन रहनु जनताप्रति सरोकारविहीनताको प्रमाण भएको भन्दै स्थानीयले आक्रोश पोखेका छन्।
इञ्जिनियर र सडक विज्ञहरूले पनि धुमैया खोलामा तत्कालै स्थायी संरचना—तटबन्ध र सुरक्षित पुल निर्माण नगरेसम्म समस्या समाधान नहुने ठहर गरेका छन्। उनीहरूको भनाइमा, बारम्बार भास्सिने र फस्ने सवारीसाधन मात्र होइन, यात्रुको ज्यान समेत उच्च जोखिममा पर्छ।
आजको घटनामा स्थानीयले यात्रु सवार स्कारपियो जिपलाई नदीमै उभिएर धकेल्दै पार गरेका दृश्यहरूले समस्या कति भयावह बनेको छ भन्ने देखाएको छ। यात्रुहरू चिच्याउँदै, स्थानीय जोखिम मोलेर खोलाको उर्लदो पानीबीच स्कारपियो धकेलेर पार गर्दा सुरक्षित हुन सकेका थिए। “यो त भाग्यमानी भइयो, भोलि के हुन्छ कसलाई थाहा?” स्थानीयले चिन्ता व्यक्त गरे।
घटनापछि आक्रोशित स्थानीयहरूले राज्य निकायलाई छिट्टै समाधान खोज्न आग्रह गरेका छन्। “हामी वर्षौँदेखि माग गर्दै आएका छौँ। तर, सरकारले सुन्ने वाला देखिँदैन। यसपालि पनि बेवास्ता भयो भने हामी सडकमा उत्रन बाध्य हुनेछौँ,” उनीहरूले चेतावनी दिएका छन्
