खेमराज भट्ट
काठमाडौँ – नेपाली कला क्षेत्रमा पछिल्ला वर्षहरूमा धेरै कलाकारहरू उदाए, तर केही कलाकारले मात्र दर्शकको मनमा गहिरो छाप छोड्न सकेका छन्। त्यसमध्ये एक नाम हो गजित बिष्ट। चलचित्र, म्युजिक भिडियोदेखि हास्य टेलिफिल्मसम्म सक्रिय रहँदै आएका बिष्टलाई आज धेरै दर्शकले ‘जेठान’ नामले समेत चिन्छन्।
गजित बिष्टले नेपाली चलचित्र क्षेत्रमा अभिनयमार्फत आफ्नो छुट्टै पहिचान बनाउनुभएको छ। फरक–फरक भूमिकामा आफूलाई ढाल्न सक्ने क्षमताका कारण उहाँलाई दर्शकले मन पराएका छन्। भावनात्मक अभिनय, जीवन्त प्रस्तुति र पात्रसँग एकाकार हुने शैली उहाँको विशेषता हो।
त्यस्तै, थुप्रै लोकप्रिय म्युजिक भिडियोहरूमा समेत उहाँको उपस्थिति रहेकाले उहाँलाई बहुआयामिक कलाकारका रूपमा परिचित बनाएको छ।
गजित बिष्टलाई अझ बढी परिचित बनाउन मद्दत गरेको माध्यम हो लोकप्रिय हास्य टेलिफिल्म ‘सक्किगोनी’। यसमा उहाँले निभाउनुभएको ‘जेठान’को भूमिका निकै चर्चित रह्यो। हास्य र व्यङ्ग्यलाई जीवन्त बनाउन सक्ने उहाँको कला यथार्थसँग जोडिएको हुँदा दर्शकहरूले तत्कालै अपनाएका थिए।
यही कारणले आज पनि धेरैले उहाँलाई वास्तविक नामभन्दा ‘जेठान’ कै नामले चिन्छन्।
गजित बिष्ट मनोरञ्जनमै सीमित कलाकार होइनन्। उहाँले सामाजिक यथार्थलाई समेत अभिनयमार्फत प्रस्तुत गर्दै आउनुभएको छ। विशेषगरी “दुःखको पोको” जस्ता सिर्जनामा उहाँले भुटानी शरणार्थीहरूको पीडादायी जीवनलाई पर्दामा उतार्दा धेरै दर्शकको आँखा रसाएको थियो।
सहकर्मीप्रति आदरभाव राख्ने, साथीभाइसँग आत्मीय सम्बन्ध कायम राख्ने गजित बिष्टलाई धेरैले केवल कलाकार मात्र नभई एक असल मानवका रूपमा पनि हेर्ने गरेका छन्। उहाँको सरल स्वभाव र मित्रवत व्यवहारले लोकप्रियतामा थप आयाम जोडेको छ।
चलचित्र, म्युजिक भिडियो र हास्य टेलिफिल्ममार्फत निरन्तर योगदान दिँदै आउनुभएका गजित बिष्टलाई अझ धेरै नयाँ भूमिकामा देख्ने दर्शकको अपेक्षा छ। अभिनयमा निरन्तरता र कलात्मक यात्रामा नयाँ उचाइ हासिल गर्दै जानुभएका उहाँलाई शुभकामना दिँदै दर्शकले भन्छन्
यसरी, गजित बिष्ट नेपाली कला–साहित्य र मनोरञ्जन जगतका मन जित्ने कलाकारका रूपमा स्थापित भइसकेका छन्।
