हेमा भट्ट, कञ्चनपुर — कार्तिक २१, २०८२
कृष्णपुर नगरपालिका–२, बंकस्थित श्री उदय माध्यमिक विद्यालयले कक्षा ११ का नयाँ विद्यार्थीहरूको स्वागत कार्यक्रमका साथै NCC तर्फको सांस्कृतिक कला र कवाज प्रदर्शन कार्यक्रम भव्य रूपमा सम्पन्न गरेको छ।
विद्यालयको प्राङ्गणमा आयोजित उक्त कार्यक्रमको सभापति विद्यालय व्यवस्थापन समिति अध्यक्ष
दिपेन्द्र पाल रहेका थिए भने मुख्य अतिथि कृष्णपुर नगरपालिकाका नगर प्रमुख हेमराज ओझा तथा विशिष्ट अतिथि वडा नं. २ का अध्यक्ष अर्जुन सिंह साउद रहेका थिए। त्यसैगरी विद्यालयका प्रधानाध्यापक वम्मन राना, सह–प्रधानाध्यापक महावीर चन्द, राष्ट्रिय सेवा दल पश्चिमका तालिम प्रशिक्षक धर्मराज भट्ट र दिनेश पाण्डेय लगायत शिक्षक, व्यवस्थापन समिति सदस्य, समाजसेवी, पत्रकार तथा विद्यार्थीहरूको उल्लेखनीय उपस्थिति रहेको थियो।?
कार्यक्रममा प्रमुख अतिथि नगर प्रमुख हेमराज ओझाले विद्यालय र विद्यार्थीप्रति प्रशंसा व्यक्त गर्दै शिक्षा नै जीवनको आधार भएकाले अनुशासन, श्रम र लगनशीलता विद्यार्थीको पहिचान हो भन्ने सन्देश दिएका थिए। उनले विद्यालयका क्रियाकलापमा नगरपालिकाबाट आवश्यक सहयोग गर्ने प्रतिबद्धता पनि जनाए।
विशिष्ट अतिथि वडा अध्यक्ष अर्जुन सिंह साउदले आफैं पनि यही विद्यालयका विद्यार्थी भएको स्मरण गर्दै विद्यालयको निरन्तर प्रगतिमा सधैं सहयोगी हात रहने बताए। उनले भने, “शिक्षा जीवनको उज्यालो मार्ग हो, यसलाई अनुशासन र परिश्रमले सजाउनुपर्छ।
विद्यालयका प्रधानाध्यापक वम्मन रानाले स्वागत मन्तव्यका क्रममा नयाँ विद्यार्थीलाई हार्दिक शुभकामना दिंदै विद्यालयलाई अनुशासन र गुणस्तरीय शिक्षाको केन्द्र बनाउन सबैको सहकार्य आवश्यक रहेको बताए।
कार्यक्रममा विद्यालय व्यवस्थापन समिति सदस्य दिनेश पाण्डेयले NCC तालिमको महत्त्व, यसको सुरुवात र आवश्यकता बारे प्रष्ट धारणा व्यक्त गर्दै विद्यार्थीलाई देशप्रेम, अनुशासन र नेतृत्व क्षमतामा निखार ल्याउने माध्यमको रूपमा NCC को योगदान उल्लेख गरे।
कार्यक्रममा कक्षा १२ की छात्रा बिमला भट्टले स्वागत मन्तव्य दिएकी थिइन् भने सञ्चालन आशा विष्टले गरिन्। उनले सम्पूर्ण कार्यक्रमलाई सभ्य, सुसंस्कृत र आकर्षक ढंगले सञ्चालन गरेकी थिइन्।
नयाँ विद्यार्थीहरूलाई विद्यालयका प्रधानाध्यापक, व्यवस्थापन समिति अध्यक्ष, विशिष्ट अतिथि तथा शिक्षकहरूले फूलमाला र टीका लगाई स्वागत गरेका थिए।
सांस्कृतिक प्रस्तुतिहरूमा NCC विद्यार्थीहरूद्वारा देशभक्तिपूर्ण नृत्य, सहिदको स्मरणमा नेपाली नृत्य–नाचगान, राष्ट्रिय गानसहित कवाज प्रदर्शन गरिएको थियो। यी प्रस्तुतिहरूले उपस्थित सबैको मन जितेको थियो।
कार्यक्रमको अन्त्यमा सभापति दिपेन्द्र पाले विद्यालयको प्रगति र अनुशासनका लागि सबै पक्षको सहकार्य अपरिहार्य रहेको बताउँदै नयाँ विद्यार्थीलाई सफल शैक्षिक यात्रा र उज्ज्वल भविष्यका लागि शुभकामना व्यक्त गरे।
यसरी कक्षा ११ का विद्यार्थीको स्वागत तथा NCC सांस्कृतिक कला र कवाज प्रदर्शन कार्यक्रम उत्साहपूर्वक सम्पन्न भएको विद्यालयले जानकारी दिएको छ।
