हेमा भट्ट, कञ्चनपुर —सुदूरपश्चिम प्रदेशका वन उपभोक्ता समूहहरूले आफ्ना मागहरू सम्बोधन नभएको भन्दै पुनः आन्दोलनको तयारी थालेका छन्। प्रदेश सरकारको उद्योग, पर्यटन, वन तथा वातावरण मन्त्रालयले वन ऐन र नियमावली विपरीत काठ बिक्रीमा रोक लगाएको भन्दै उनीहरू असन्तुष्ट बनेका हुन्।
यसै विषयमा सुदूरपश्चिम प्रदेशस्तरीय वन उपभोक्ता समूहहरूको आन्दोलन परिचालन समन्वय समितिको बैठक मिति २०८२ कार्तिक १० गते बिहान ९:०० बजे कञ्चनपुरको कृष्णपुर–९, घोडाघाटस्थित सिता सामुदायिक वन उपभोक्ता समूहमा बस्ने भएको छ।
बैठकमा मागहरू सम्बोधन नभएकाले आन्दोलन पुनः सञ्चालन गर्ने निर्णय हुने जनाइएको छ। समितिले सबै सदस्यहरूलाई अनिवार्य उपस्थितिका लागि अनुरोध गर्दै सम्पर्क नम्बर ९८४८४२९४६७ सार्वजनिक गरेको छ।
२३ बुँदे माग अझै सम्बोधन भएनन्
समितिले सरकारलाई अघि सारेका २३ बुँदे मागहरू मध्ये मुख्य मागहरूमा—
वन उपभोक्ता समूहहरूको अधिकार संरक्षण,
दिगो वन व्यवस्थापन कार्यविधि तत्काल स्वीकृति र कार्यान्वयन,
सामुदायिक वनबाट उत्पादन भएका काठ–दाउराको स्वतन्त्र बिक्री व्यवस्था,
वन नीतिमा स्थानीय सहभागिता सुनिश्चितता — जस्ता विषयहरू समावेश छन्। तर, लामो समयसम्म माग सम्बोधन नभएपछि समितिले आन्दोलनलाई पुनः निरन्तरता दिनुपर्ने बाध्यता आएको जनाएको छ।
समितिले प्रेस विज्ञप्ति जारी गर्दै भनेको छ—
सरकारले सामुदायिक वन उपभोक्ता समूहहरूको अधिकार खोस्ने निर्णय फिर्ता नगरे आन्दोलन अझ सशक्त रूपमा अघि बढाइनेछ। यसको सम्पूर्ण जिम्मेवारी प्रदेश सरकारकै हुनेछ।
समितिका पदाधिकारीहरूले सामुदायिक वन प्रणाली जनताको सहभागितामा निर्माण भएको सफल मोडल भएको उल्लेख गर्दै सरकारी हस्तक्षेपलाई “जनविरोधी” बताएका छन्। उनीहरूले सामुदायिक वनलाई स्थानीय अर्थतन्त्र, वातावरणीय सन्तुलन र रोजगारीको आधार भएको भन्दै त्यसमा हुने हस्तक्षेप तुरुन्त रोक्न आग्रह गरेका छन्।
सुदूरपश्चिमका अधिकांश ग्रामीण बस्ती सामुदायिक वनमा निर्भर रहेका छन्। वन उपभोक्ता समूहहरूको अगुवाइमा काठ, दाउरा, घाँस, जडिबुटी लगायतका स्रोतहरूको जिम्मेवारीपूर्ण उपयोग हुँदै आएको समितिको दाबी छ। तर, काठ बिक्री रोक्का र कार्यविधि अस्वीकृत भएपछि सामुदायिक आयस्रोतमा गम्भीर असर परेको भन्दै स्थानीयहरूले समेत सरकारप्रति असन्तुष्टि जनाएका छन्।
बैठक मिति: २०८२ कार्तिक १० गते बिहान ९:०० बजे
स्थान: सिता सामुदायिक वन उपभोक्ता समूह, कृष्णपुर–९, घोडाघाट, कञ्चनपुर
एजेंडा: चरणबद्ध आन्दोलन घोषणा
मागहरू: २३ बुँदे माग तुरुन्त सम्बोधन
मुख्य माग: काठ बिक्री रोक्का निर्णय फिर्ता
सम्पर्क: ९८४८४२९४६७
