कात्तिक ३० गते । नेपाल प्रिमियर लिग (एनपिएल) को तेस्रो संस्करणको लिग चरणका खेल सकिएसँगै चार टोलीले प्लेअफमा स्थान बनाएका छन् । सोमबार सम्पन्न दुई खेलपछि लुम्बिनी लायन्स, सुदूरपश्चिम रोयल्स, काठमाण्डु गोर्खाज र चितवन राइनोज प्लेअफमा पुगेका हुन् । बाँकी चार टोलीको उपाधि यात्रा भने टुङ्गिएको छ ।
लिग चरणमा लुम्बिनी लायन्सले उत्कृष्ट नतिजा निकाल्दै शीर्ष स्थान हासिल गरेको छ । रोहितकुमार पौडेलको कप्तानीमा रहेको लुम्बिनीले सात खेलमध्ये पाँचमा जित, एकमा हार र एक खेलमा वर्षाका कारण अङ्क बाँड्दै ११ अङ्क जोडेको छ । गत संस्करणको विजेता लुम्बिनी यसपटक पनि उपाधि रक्षा गर्ने लक्ष्यमा छ ।
दीपेन्द्रसिंह ऐरीको नेतृत्वमा रहेको सुदूरपश्चिम रोयल्स १० अङ्कसहित दोस्रो स्थानमा रह्यो । टोलीले सात खेलमध्ये पाँचमा जित र दुईमा हार व्यहोरेको छ । अघिल्ला दुई संस्करणमा फाइनल खेलेको सुदूरपश्चिम लगातार तेस्रोपटक प्लेअफ पुग्ने पहिलो टोली बनेको छ ।
करण केसीको कप्तानीमा रहेको काठमाण्डु गोर्खाजले सात खेलबाट चार जित र तीन हारसहित आठ अङ्क जोड्दै तेस्रो स्थान हासिल गर्यो । टोली लगातार दोस्रोपटक प्लेअफमा पुगेको हो ।
चितवन राइनोज सात अङ्कसहित चौथो स्थानमा रहँदै प्लेअफमा प्रवेश गरेको छ । चितवनले सात खेलमध्ये तीनमा जित र तीनमा हार व्यहोरेको छ भने एक खेल वर्षाका कारण रद्द भएको थियो । अब टोलीले लिग चरणका कमजोरी सुधार्दै नकआउट चरणमा राम्रो प्रदर्शन गर्ने लक्ष्य राखेको छ ।
यसपटक विराटनगर किङ्सको प्रदर्शन अपेक्षाअनुसार हुन सकेन । सात खेलमध्ये तीनमा जित र चारमा हार बेहोरेको विराटनगर शीर्ष चारमा पर्न असफल भयो । गत संस्करणमा लिग चरणको दोस्रो स्थानमा रहेको टोली यसपटक प्लेअफबाट बाहिरिएको छ ।
कर्णाली याक्सले सात खेलबाट तीन जित र चार हारसहित छैटौँ स्थानमा रहेर प्रतियोगिता टुङ्ग्यायो । पोखरा एभेन्जर्सले दुई जित र पाँच हारसहित चार अङ्क जोड्दै सातौँ स्थान हासिल गर्यो । प्रतियोगिताका तीनवटै संस्करणमा सहभागी पोखरा अहिलेसम्म प्लेअफमा पुग्न सकेको छैन ।
पहिलो संस्करणको विजेता जनकपुर बोल्ट्स यसपटक अङ्कतालिकाको अन्तिम स्थानमा रह्यो । सात खेलमध्ये दुईमा जित र पाँचमा हार व्यहोरेको जनकपुरले चार अङ्क मात्र जोड्यो । गत संस्करणमा पनि पुछारमा रहेको टोलीले यसपटक आफ्नो प्रदर्शन सुधार गर्न सकेन ।
लिग चरण पूरा भएसँगै अब प्रतियोगिता उपाधि छिनोफानो हुने चरणमा प्रवेश गरेको छ । शीर्ष स्थानको लुम्बिनीले उपाधि रक्षा गर्ने लक्ष्य राख्दा सुदूरपश्चिम, काठमाण्डु र चितवन पहिलोपटक उपाधि जित्ने प्रयासमा हुनेछन् ।
